La Tarantella di lu forasedi

Chista è l'abballata
di lu Jude' forasedi
Serbi a farinni na risata
ma la cantu in bonafedi

E mentri chiddru di lu nordi
vidennu lu nostru mari rusica
Maestro... Musica !

Finuti li scoli, crisci
e un futuru t'à ghiri a circa'
Me nannu dicía "cu nesci arrinesci"
ma lu tintu è pi cu si nni va

E si vo campari famiglia
e 'un vo fari lu briganti
Arricogliti li striglie
e vai a fari l'emigranti

Hannu passatu già... Sti 12 anni
11 misi e 24 jorna
La cantu pi tutti... ddri latitanti
ca a nord si eru a rumpiri li corna

Avi anni chi mancu
ca lu munnu m'avía a manciari
Ma di firriàri sugnu stancu
e ora vulissi riturnari

Ma pozzu veniri sulu d'estati
quannu cca nun si travaglia
E pi li festi cumannati
scappu nti la me famiglia

Ma arrivatu a Porta Palermu
e a lu paisi mettu un pedi
Accumincia lu me 'Nfernu
la tarantella d'u forasedi

Pi salutari li parenti
mi squaglianu deci uri
E 'un m'à scurdari nenti
"Aiutatimi pi ffauri"

Si passi nni to nanna
pi siggiri quacche cosa
T'aspetta 'na cunnanna
cu la rima e senza prosa

Passa nni to cummari ca vidica accatta'
passa nni to cuscinu ca aguannu si marita'
passa puru nni to ziu ca l'atru jornu s'allavanca'
Si... E macari passu nn'a Zza Fonzia
ca la gaddrina ci fita'

Senza farimi sentiri
mi jettu di la terrazza
Satu 'n capu lu muturi
e partu pi la chiazza

"Lu quannu arrivasti ?"
e mi cumincianu a vasa'
Schiticchi, manciati e festi
e po'... "Lu, ma quannu ti nni va?"

'Nchia, pari ca l'hann'à simari
quannu trasi e quannu nesci
Ti lu fannu schifiari
ca a momenti t'arrovesci

Su li cincu di matinu
a me pa' chi c'é cuntari?
Lu squagliacquazzina scappa pi primu
miiinchia... M'ú 'mmaginu 'u chiffari

M'arricampu e nna cucina
c'è me ma' cu 'u stiraturi
M'assicuta cu na tappina
"chiustu nun'è n'albergo a uri"

Nti sta casa si mancia all'ottu
e guai a tía si ti susi
Ma'! staiu facennu 'u bottu
e un mi trasinu li cazi

Po' 'ncumincianu li 'mmiti
stasira intra nni mia
Cuscini, parenti e ziti
la Zza Milina e me Zza Rusalia

'Na simana a lu Paisi
mi parsi na Pricissioni
Manciavu pi quattru misi
e haiu la facci un bomboloni

E ancora vaiu pinzannu
ma cu mi lu fici fari ?
Scinnu a l'appedi natr'annu
ca sta panza av'à scalari

Ma picciotti, passa lu tempu
e purtroppu 'un porta sbagliu
E arriva sempri lu mumentu
di rientrari a lu travagliu

Si prima era sdignatu
ora 'un sacciu chi vi diri
Vi cuntavu 'na minchiata
MAI mi nni vulissi 'iri

Dopu du jorna ch'arrivi
ti sona lu pustinu
Tumazzu, pani e alivi
minchia... Lu paccu di 'Gustinu!

Chi arrivaru così rutti?
addumannanu li genti
Chi? Me ma li ntruscia tutti
ca mancu un narcotrafficanti

Mi manca lu me paisi
e macari lu me gabinetto
Mancu ha passatu un misi
Ahiii... Ch'è scommidu stu lettu

Nun mi putiti capiri
si ristastivu a Bivona
Cca suli 'un si nni vidi
ci su spissu lampi e trona

Nun c'è la mamá in cucina
'na pizza ti po' ordinari
Ma criuca la mpastanu cu la cacina?
ci voli curaggiu pi s'à manciari

Accura a lu mercatu
cca 'un sa nzoccu ti manci
Li persicu pari salatu
pi 'un parlari di l'aranci

Nn' hannu di così boni
e sunnu cchiù allittrati
Ma nun c'è paraguni
natri semmu raccumannati

No pi comu ti talía
e comu ti tratta sta genti
Ma nti la terra mia
paremmu tutti parenti

Lu signuri la pinza' bona
di ddra 'n capu, unn'è ch'è misu
Nni detti la megliu zona
la Sicilia, lu paradisu

La zagara, lu frummentu
e li jorna ca passanu lenti
Li pinzera si li porta lu ventu
pi chissu campammu cuntenti

E stappu sta buttiglia
ca vinu nn'haiu a tinchité
E brindo a lu me Paisi
la me famiglia, li Jude'


...dedicata al mio amato paese, Bivona, 
e a tutti i Siciliani lontani da casa.

[ Lucio Speciale 

Bologna, 27 Aprile 2020 ]