Terra Bisbona

Bivona ora di tutti ti fa chiamari,

‘nti la storia tanti nomi ti ficiru canciari.

Di tempi antichi ti ponnu ricurdari

a tanti ha datu postu pi abitari.

Di la preistoria ancora resti ci sunnu

cu un geositu unicu ‘nta lu munnu.

Parlu di Pizzo Mondello ca ha statu studiatu

speru ca prestu sia cchiù valorizzatu.

Jennu ‘ntornu all’annu milli e ddra vicinu

esistiva unni si tu n’anticu casalinu,

di arabi siciliani fu abitatu

già di artisti di l’epuca ricurdatu.

Quarche tempu dopu si cumincià a furmari

stu paiseddru amatu di tanti chi t’appimu a lassari.

Nasceru li primi casi, cu li primi cummenti

convivianu tutti ‘nsemmula filici e cuntenti.

Sutta lu duminiu di li Chiaramunti

si sviluppa stu paisi sutta di stu munti.

Chiddra di li Luna fu n’epuca ecceziunali

di la Sicilia fusti la prima città ducali.

Carlu V ti detti l’onuri di essiri Città,

li paisi cu stu titulu nun sunnu tantu assà.

Arrivaru li Gesuiti e purtaru la cultura

cu li primi scoli chi esistianu allura.

Passaru tanti anni, s’arrivà a lu Regnu

e pi capu circundariu tu nni eri degnu.

Bixio passannu si fici ‘na manciata

cu lu figliu di Garibaldi, e cuntinuaru l’acchianata.

Nascì lu Ginnasiu e cu storia secolari

continua a dari a tutti l’occasioni di studiari.

Passaru puru li guerri e tu resististi

finu a li nostri jorna a tanti ti mustrasti.

‘Nti sti quattru righi la storia nni passà,

di populi e mumenti diversi ‘nquantità.

Ci foru arabi, spagnoli, ebrei abbunnati

Nni lassaru tanti cosi ‘nti la lingua e ‘nti li strati.

‘Nti li ngiurii n’avemmu assà vidè

pi meritu di l’ebrei nni misiru Judè.

Di tia tanti appimu ad emigrari

Ma no picchì judè, ma sulu pi campari.

Cu parti luntanu e assà sta senza tia

Nni senti notti e jornu nustalgia.

Picchì a li to figli duni tanti cosi boni:

l’acqua, lu suli, l’aria e po li tradizioni,

l’amuri, la gioia pi la to popolazioni

ca ci assicuri ‘nti li tanti occasioni.

A lu spissu dicemmu ca ‘un c’è nenti

ma stannu luntanu la mancanza si senti:

di l’acqua frisca di li cannulicchi,

di la tranquillità c’assirena l’aricchi,

di passari lu tempu cu parenti e amici

parlannu ‘nsicilianu pi nni sentiri filici.

Mancanu tanti cosi ca prima nun pinsammu

Sulu quannu nni jemmu veramenti l’apprizzammu.

Quannu semmu luntani nni manca ogni cusuzza

Nni si strinci lu cori, lu scunfortu n’ammazza,

pinsannu ‘nsoccu si facia ddra, ‘nti ddra viuzza

ca comu ‘na cristiana a lu so pettu t’abbrazza.

Senza pinseri si stava ‘nti la strata,

pi jucari di nichi o pi ‘na chiacchiariata

sidennu cu li vicini passava la jurnata

‘nti ddri botti di casdu di la stasciunata.

Si nisciva cu l’amici, sia di nichi ca di granni’

di lu paisi canusciamu tutti li banni

Nni sintiamu ricchi senza aviri li miliuna

picchì di lu paisi canusciamu tutti l’agnuna.

Ora manca tuttu chistu, ca nti l’appartamenti

a lu spissu li vicini sunnu troppu diffidenti,

ti salutanu di cursa, senza tanti comprimenti

si ti capita quarcosa po muriri veramenti.

Ma li to figli, o Bivona, sunnu tutta n’atra cosa

Sunnu comu ‘na famiglia ‘nti ‘na granni casa.

Ogni annu riturnammu cu anima fistosa

ca lu dittu dici veru: “la so casa strinci e vasa”.

Riturnammu all’abitudini di stari a lu paisi

ca mancu pari hammu mancatu tanti misi.

‘Ncuntrammu li parenti e l’amici affezionati:

“Amunì, jemmu a lu bar” e nni facemmu du risati.

Anchi sulu stari ‘nsemmula, a la villa assittati,

porta paci ‘nti lu cori e nni sintemmu risturati.

Ma lu tempu è gran tirannu, è ura di ti lassari,

di nni nni jiri luntanu, a la stranìa riturnari.

Di lassari la famiglia cu lu scuru ntra lu cori

pi na pocu di jorna la risata a mia mi mori.

Picchì tu, Bivona mia, si comu ‘na beddra zita

quannu ti lassu nun havi sensu chista vita.

Quannu tecchia m’arripigliu parlu sempri di tia

e mi dicinu: “Quantu l’ami? Di ‘nti l’occhi si vidìa”

Si travaglia normalmente ma a tia torna la testa

speci si ddru jornu a Bivona c’è ‘na festa.

Ca lu stari luntanu è sulu pi lu travagliu

Ma travagliu senza affetti è sulu un granni sbagliu.

Ma ji speru ‘nta la vita di putiri riturnari

e di partiri di tia sulu sulu pi viaggiari.

Riturnari ‘nta li vii chi mi vittiru crisciri

cu l’affettu sinceru, chiddru granni di li visciri.

A tia, beddra Bivona, quantu t’amu ti dichiaru

L’hannu fattu tanti e tanti, o ‘nsilenziu o dittu chiaru.

L’amuri pi tia nun putrà mai finiri,

sarà sulu, e speru tardu, quannu è ura di muriri.

Ma anchi di mortu sempri a tia ji è pinsari

taliannuti di ‘ncapu, matri mia, m’è arricriari.

Ora ti lassu, quattru cosi ti li dissi,

e mi trattinivu, tanti cosi nun ti scrissi.

Appena tornu nni videmmu, mi darai aria bona

la beddra acqua frisca ca tutti cosi sana,

ed è propriu veru, tu si terra Bisbona,

gioiellu di la megliu terra siciliana.

Sugnu di tia n’indegnu figliu,

ti pensu forti e mi dinchiu d’orgogliu,

salutu li paisani, a cu pigliu pigliu

ji, Vincenzu Guida e lu beni ca vi vogliu.

Vincenzo Guida